Уапсени 52 лица за време на церемонијата на крунисување на Чарлс III
Британската полиција денеска уапси 52 лица за време на церемонијата на крунисување на кралот Чарлс Трети.
Тие наводно биле приведени за повеќе кривични дела, вклучително и поттикнување конфликт и нарушување на јавниот ред и мир и се задржани во притвор, јавува Би-би-си.
Демонстрантите и групите за човекови права ја критикуваа полицијата за апсењето на демонстрантите против монархијата, а Human Rights Watch го опишува апсењето како „нешто што би очекувале да го видите во Москва, а не во Лондон“.
Стотици демонстранти облечени во жолто се собраа меѓу граѓаните на патеката на поворката во центарот на Лондон и држаа натписи на кои пишуваше „Не е мојот крал“.
Антимонархиската група „Република“ објави дека нејзиниот водач Греам Смит бил приведен пред поаѓањето на поворката и дека на социјалните мрежи кружеле фотографии на кои се гледа како полицајци им земаат плакати од демонстрантите.
Командантот на лондонската полиција Карен Финдлеј рече дека апсолутно ја разбира загриженоста на јавноста по апсењето.
Таа додаде дека полицијата во претходните 24 часа започнала голема операција откако добила информација дека демонстрантите се решени да го нарушат крунисувањето.
Републиката вети дека ќе го организира најголемиот протест против британскиот монарх во модерната историја, при што демонстрантите свиреа додека кралот Чарлс и кралицата Камила одеа кон Вестминстерската опатија и службата беше јавно емитувана на звучници.
Протести се одржаа во Глазгов, Шкотска и Кардиф, Велс, а учесниците држеа натписи „Укинете ја монархијата, нахранете ги луѓето“.
На социјалните мрежи, многумина ја споредија кризата со трошоците за живот во Британија со раскошот и величественоста на крунисувањето.
