Уапсен екс-правобранителот Фехми Стафа, под сомнение за тежок поткуп
Поранешниот Државен правобранител на Македонија, Фехми Стафа, вечерва е лишен од слобода во полициска акција. Апсењето на еден од некогашните клучни луѓе за заштита на државниот имот предизвика силен одек во јавноста.
Иако официјалните институции сè уште не излегуваат со детално соопштение, првичните информации укажуваат на сериозни сомневања за коруптивни дејствија.
Според неофицијални и сè уште непотврдени информации од истрагата, Стафа е приведен поради основи на сомнение за сторено кривично дело поврзано со примање поткуп.
Извори блиски до истрагата брифираат дека станува збор за сума од неколку десетици илјади евра, пари кои наводно биле барани или примени за извршување или неизвршување на службено дејствие.
Во моментов не се познати повеќе детали за околностите на апсењето, ниту дали во акцијата се опфатени и други лица. Се очекува Министерството за внатрешни работи и надлежното Обвинителство во текот на ноќта или утрешниот ден да излезат со официјални информации за случајот и за правната квалификација на делото.
Стафа на функцијата дојде како предлог на Алтернатива, а се поврзуваше и со ДУИ. Против Стафа, имаше и низа пријави во Финансиската полиција.
Фехми Стафа ја извршуваше функцијата Државен правобранител, институција чија примарна задача е да ги штити имотните права и интереси на Македонија пред судовите и органите на управата.
