УАПСЕН ЕДЕН ОД НАПАЃАЧИТЕ Маскиран маж отвори оган среде католичка црква во Истанбул, едно лице е убиено
Турската полиција уапси еден од напаѓачите на католичката црква во Истанбул, во која загина едно лице, јавија денеска турските медиуми. Турскиот министер за внатрешни работи Али Јерликаја претходно изјави дека двајца напаѓачи отвориле оган во црквата Света Марија, каде што убиле едно лице.
Весникот „Милијет“ пишува дека антитерористичките единици уапсиле еден од напаѓачите.
Турскиот претседател Реџеп Таип Ердоган претходно денеска изрази сочувство до католичката заедница во Истанбул во врска со нападот на црквата во кој загина едно лице и најави дека ќе бидат преземени неопходните чекори за апсење на убијците.
Сочувство упати и папата Франциско, кој изјави дека е со католичката заедница во Истанбул.
Маскирани напаѓачи упаднале во црквата за време на богослужбата
Да потсетиме, двајца маскирани напаѓачи извршија вооружен напад врз католичката црква во Истанбул за време на неделната богослужба, при што едно лице беше убиено, изјави денеска турскиот министер за внатрешни работи Али Јерликаја.
Според најавата на Јерликаја, вооружени напаѓачи упаднале во црквата Света Марија во истанбулскиот кварт Саријер во 11 часот и 40 минути по локално време, јавува турскиот сервис на Си-Ен-Ен.
Министерот рече дека двајцата напаѓачи носеле маски и биле присутни со верниците за време на неделната молитва.
