Трошоците на живот и цените на мало со нов раст во април
Животот во државата продолжува да поскапува, покажуваат најновите податоци на Државниот завод за статистика, според кои трошоците на животот во април 2026 година се зголемени за 5,7% во споредба со истиот месец лани, додека цените на мало бележат раст од 5,0%.
На месечно ниво, односно во однос на март 2026 година, инфлацијата изнесува 1,3%, што укажува на континуиран, но нешто побавен раст на цените.
Податоците покажуваат дека најголемо месечно зголемување е забележано во групата Транспорт, каде трошоците се зголемиле за 10,1%. Потоа следуваат Рекреација, спорт и култура со раст од 1,4%, како и Алкохолни пијалаци, тутун и наркотици со 1,2%.
Покачување е регистрирано и кај Храна и безалкохолни пијалаци за 0,7%, додека кај Облека и обувки, Лична нега, социјална заштита и разновидни стоки и услуги, како и кај Информации и комуникации, растот изнесува 0,6%.
Понатамошно зголемување од 0,4% е забележано кај Ресторани и услуги за сместување, додека кај Домување, вода, електрична енергија, гас и други горива, Здравствена заштита и Услуги за образование растот изнесува 0,3%.
Единствено намалување е регистрирано кај групата Покуќнина, опрема за домаќинствата и редовно одржување на домаќинствата, каде трошоците се намалени за 0,2% во однос на претходниот месец.
Според статистиката, податоците укажуваат на општ тренд на раст на цените, при што најголем притисок врз трошоците на домаќинствата доаѓа од транспортот и основните животни потреби.
