Тројца осомничени за дивата депонија во Вардариште, МВР поднесе кривични пријави по протестите на граѓаните
По неколкудневниот пожар и денешните граѓански блокади поради загадувањето од Вардариште, Министерството за внатрешни работи информираше дека поднело кривични пријави против три лица за создавање на дива депонија на истата локација.
Од СВР Скопје соопштија дека по извршени претреси вчера и денеска, до Основното јавно обвинителство Скопје е поднесена кривична пријава по брза постапка против М.М.(54), А.А.(28) и Ф.А.(41), сите од Скопје. Тие се сомничат дека сториле кривично дело „загрозување на животната средина и природата со отпад“.
Според полицијата, тројцата осомничени подолг временски период, заклучно со вчерашниот ден (2 септември), на улицата „Зендел Џемаил“ во рамките на Вардариште, создале депонија спротивно на сите прописи за заштита на животната средина.
„Тројцата вршеле дејност – откуп на старо железо, метални производи, стари акумулатори и други обоени метали на импровизирани пунктови, без означена фирма, без да регистрираат правно лице и без да поседуваат соодветна дозвола за управување со отпад“, се вели во соопштението на МВР.
Од таму додаваат дека со оставањето, фрлањето и непрописното транспортирање на отпад, осомничените влијаеле на квалитетот на почвата и воздухот и предизвикале опасност по животот и здравјето на луѓето.
Оваа полициска акција следува како одговор на огромниот притисок од јавноста, откако пожарот кој избувна во неделата предизвика неподнослива миризба и чад над источниот дел на Скопје, што резултираше со секојдневни блокади на клучни сообраќајници од страна на револтираните граѓани.
