ТРКА ПО ПАРИ: Со платата го одржуваат домаќинството, а секој денар плус го трошат за да си дозволат нешто повеќе

Многу македонски
граѓани кои се вработени, работат и хонорарна, дополнителна работа со
флексибилно работно време, која ќе им донесе заработка плус.

Овие граѓани
објаснуваат дека со платата ги покриваат основните трошоци за живот, купуваат
храна и плаќаат сметки, а парите заработени од друг ангажман ги трошат за да си
дозволат нешто повеќе, како одење на одмор или да излезат за викенд надвор од
градот или државата. Дополнителните приходи им влеваат одредена сигурност дека
ако останат без работа, ќе имаат макар и минимален прилив на пари додека да
најдат нова работа. Трошоците за живот се високи и граѓаните се во трка по
работа и по пари, со цел да ги задоволат потребите.  Велат дека не е лесно, но принудени се да
бараат и друг извор на приходи освен платата.

„Вработена сум
веќе 17 години. Во тој период, кога имав шанса за дополнителна работа, истата
ја користев. Има периоди кога хонорарна работа нема, но има и периоди кога
лесно се наоѓаат хонорарни ангажмани. Обично ми се случувало во текот на
летните одмори или во зима околу празниците во јануари, да нема ангажмани од
причина што во тој период луѓето слават. Таа хонорарна заработка ми значи и ми
овозможува да си дозволам некое патување плус или дури и ако не патувам, знам
дека месецов ќе заработам  некој денар
повеќе, нема да зависам само од платата, а знаеме дека платите во Македонија не
се доволно високи за удобен живот. Имам познаници и пријатели кои го прават
истото, работат и дополнителна работа ако се укаже прилика. Едноставно
трошоците за живот растат постојано и мораме да се снаоѓаме. Сметајте дека има
семејни луѓе кои земаат плата од 25.000 или 27.000 денари и тие пари не се
доволни за пристојно живеење“, вели наша соговорничка.

Социологот Лилјана
Полевска објаснува дека и во иднина ќе има сè повеќе такви примери.

„Високите трошоци
и ниските плати и пензии ги принудуваат луѓето да работат, за да можат да
опстанат, да си покријат сметки, да купат лекови и да имаат достоинствен живот.
Има луѓе во средни години и пензионери кои работат нешто плус“, додава
Полевска.

Младите работат на две, а понекогаш и на три работни места
за да си дозволат квалитетно
живеење. Ова го соопштија лани од Македонската платформа против
сиромаштија. На едно четиричлено семејство му се потребни околу
1.000 евра месечно за да преживее според синдикалната кошничка која ја
пресметува Сојузот на синдикати на Македонија. Поточно на едно семејство во март
годинава му биле потребни безмалку 59.000 денари за покривање
на основните потреби. Во огласниците има луѓе кои бараат
дополнителна работа која би ја обавувале по 16, 17 часот во работните денови
или за викенди. Како што наведуваат во огласите, спремни се да разнесуваат
роба, да чистат, да одат на промоции, да делат флаери и слично.

Сања Атанасовска

foto freepik.com