Три медали за македонските каратисти на Европската универзијада – злато за Ангела Мојсовска

Македонските универзитетски каратисти остварија извонреден резултат на Европската универзијада во боречки спортови, што се одржа во Варшава, Полска. Нашите натпреварувачи се враќаат со вкупно три медали – златен, сребрен и бронзен, во конкуренција на студенти-спортисти од над 400 универзитети ширум Европа.

Најсјајниот медал го освои Ангела Мојсовска во категоријата до 68 килограми, студентка на Универзитетот „Св. Кирил и Методиј“ во Скопје. Таа во финалето ја совлада противничката од Косово со резултат 4-3, носејќи и злато на Македонија.

Со сребрен медал се закити Љупче Михајлов (до 75 кг), студент на Универзитетот „Гоце Делчев“ – Штип, кој во финалната борба беше поразен од турски каратист. Бронзеното одличје му припадна на Викторија Јовановска (до 61 кг), која со силна борбеност се избори за место на пиедесталот.

Вредни за почит се и пласманите на Петар Заборски и Јована Мицовска, кои го завршија натпреварувањето на петтото место.

Овој успех уште еднаш ја потврдува силата и традицијата на македонското карате, а младите студенти-репрезентативци се пример за тоа дека со труд, дисциплина и посветеност можат паралелно да се постигнат врвни резултати и во спортот и во академијата.

Македонскиот тим од Варшава се враќа со голема причина за гордост – три медали и порака дека иднината на нашиот спорт е светла.