Три кинески астронаути се вратија на Земјата по шестмесечна мисија
Тројца кинески астронаути од мисијата „Shenzhou-19“ денес се вратија на Земјата по што поминале шест месеци на кинеската вселенска станица Тиангонг, јавува агенцијата Анадолија.
Цаи Шуже, Сонг Лингдонг и Ванг Хаозе слетале на локацијата Донгфенг во северната Автономна регија Внатрешна Монголија, според извештајот на агенцијата Синхуа.
Нивното враќање било одложено за еден ден поради неповолни временски услови.
Триото, локално познато како тајконаути, беше лансирано во октомври, а за време на престојот на кинеската орбитална станица, изведувале различни научни експерименти и работеле на одржување на станицата.
Нивната мисија заврши откако екипажот на мисијата „Shenzhou-20“ успешно го презеде управувањето со станицата минатата недела. Новиот тим, кој го сочинуваат командантот Чен Донг и астронаутите Чен Џонгруи и Ванг Џие, беше лансиран минатиот четврток од Сателитскиот центар Јиукуан на северозападот на Кина и исто така ќе помине шест месеци на вселенската станица.
