Три гласа за, шест против: Советот на јавни обвинители даде негативно мислење за разрешување на Коцевски
Советот на јавни обвинители донесе негативно мислење за предлогот за разрешување на државниот јавен обвинител Љупчо Коцевски. За прифаќање на предлогот гласаа тројца членови, додека шест гласаа против. Претседателката на Советот, Душица Димитриеска, истакна дека бидејќи Советот одлуки носи со мнозинство, резултатот е негативно мислење. За поддршка на предлогот гласаа Кети Петкова, Ардиан Демири и Марјана Илиевска.
Расправата за разрешувањето на Коцевски беше затворена за јавноста, со оглед на сензитивноста на процесот. Членката на Советот, Зорица Павловиќ, се повика на член 10 од Законот за Совет на јавни обвинители, барајќи исклучување на јавноста заради заштита на угледот и интегритетот на обвинителот. Светлана Стојковиќ, исто така го поддржа предлогот, додавајќи дека се изнесени информации и доказни материјали од дисциплински постапки против двајца јавни обвинители, што дополнително ја оправдува исклученоста на јавноста.
Советот ја осуди и поставувањето експлозивна направа во возилото на јавен обвинител од Кичево, изразувајќи силна поддршка за обвинителот и институцијата.
Седницата за разгледување на предлогот беше два пати одложена, првично поради седумдневната жалост за трагедијата во Кочани, а потоа поради немање кворум. Според законските рокови, Советот треба да го разгледа предлогот до крајот на неделава, иако Владата изјави дека ќе ја прекине постапката. Портпаролката на Владата, Марија Митева, нагласи дека и ако Советот го достави мислењето, Владата нема да го прати до Собранието.
Премиерот Христијан Мицкоски, по трагедијата во Кочани, изјави дека постапката за разрешување на Коцевски ќе се запре, со оглед на чувствителната ситуација и фокусот на истрагата за трагичниот настан.
Владата, која на 11 февруари донесе одлука за започнување на постапката за разрешување на Коцевски, ја обвини функцијата на обвинителот за наводен судир на интереси и сомневање во неговата непристрасност, што Коцевски го демантира, тврдејќи дека постапувал во согласност со законот и роковите.
