Треба да платиме 77 милиони евра за да ги намалиме загубите на струја и да плаќаме помали сметки
Пресметката на „Електродистрибуција“, фирмата-ќерка на АД ЕВН, во објавениот План за намалување на загубите на електрична енергија, е дека во тековниот и наредниот период ќе се потрошат 77 милиони евра за дислокација на броилата, надвор од имотите на потрошувачите, заради намалување на загубите на електричната енергија во дистрибутивната мрежа.
Македонија е една од земјите во Европа во која најмногу се губи струјата, поради што делумно плаќаме и повисоки сметки за електрична енергија. Се губи околу 14 отсто од струјата, која сепак на крајот ја плаќаат потрошувачите. Една од мерките која ја има преземено „Електродистрибуција“ е дислокација на броилата во мерни ормари надвор од
имотот на корисниците. Истовремено се врши инсталирање на броила со далечинско отчитувње и исклучување и тоа е убедливо најефикасна мерка, според фирмата на ЕВН.
„Оваа мерка која се однесува на групни дислоакции на мерни места заради намалување на загуби, досега во
пракса се покажа како убедливо најефикасна во намалување на загубите. Уште повеќе, со реализација на оваа
мерка, не само што најмногу се намалуваат загубите, туку истата има најголемо влијание и на намалување на
вкупните загуби во целата мрежа“, велат од „Електродистрибуција“, од каде што дополнуваат дека оваа инвестиција носи и други поволности за потрошувачите.
Најголеми загуби има во скопските региони, а понатаму следуваат Гостивар, Куманово и Прилеп. Промената ќе трае десет години, а пресметките се дека загубите потоа ќе изнесуваат 10 отсто на ниво на целата држава.
Ќе се дислоцираат повеќе од 50.000 групни броила во Скопје, Гостивар, Куманово, Прилеп, Кичево, Струга и Струмица. За ова ќе бидат потребни 77,5 милиони евра, од кои најмногу – 26,5 милиони евра за скопскиот регион кој гравитира кон Куманово. Промената е почната лани, а ќе трае до 2033. Од компанијата се свесни дека ова ќе повлече и ризици на терен. Најмногу проблеми имале во Арачиново, Сингелиќ, Серава, Сарај, Грчец, итн. Тука компанијата стравува дека се можни и манипулации со новите електронски броила.
„Проблем со кој постојано се соочуваме при реализацијата на тековните проекти, а кои сигурно ќе ги има и при
идните групни дислокации се: постојан отпор на локалното население за реализација на дислокациите, напад на нашите вработени, групирање на локалното население, не дозволување на пристап на веќе дислоцираните мерни места, манипулации на броилата на дислоцираните мерни места, енергетски, економски, социјални кризи“, предупредуваат оттаму.
Според годишниот извештај за 2023 на Регулаторната комисија за енергетика, лани сме платиле 95 милиони евра за покривање на загубите во електродистрибутивниот систем. Струјата се купувала преку ЕСМ, МЕПСО и пазарот на електрична енергија.
Од „Електродистрибуција“ дополнуваат дека истовремено ќе продолжи промената на поединечните броила, за чии потрошувачи се смета дека реално трошат повеќе струја. Ќе продолжи и замената на трансформаторите и на самата мрежа за да се намалат загубите.
А.К.
