Трамп: Украина може да стане дел од Русија еден ден
Американскиот претседател Доналд Трамп изјави дека Украина „еден ден може да биде дел од Русија“, додека неговиот потпретседател Џеј-Ди Венс се подготвува да се сретне со украинскиот претседател Володимир Зеленски на крајот на неделата.
Во изјава за Фокс њуз, Трамп го повтори својот став за потребата брзо да се стави крај на војната во Украина. „Можеби ќе постигнат договор, можеби не. Можеби еден ден ќе биде руски, можеби не“, рече Трамп.
Тој исто така нагласи дека САД треба да ги вратат инвестициите во Украина преку пристап до нејзините природни ресурси, како што се ретките минерали. „Ќе инвестираме огромна сума пари и ги сакам назад. Им реков дека сакам еквивалентни, приближно 500 милијарди долари минерали од ретки земји“, рече Трамп, додавајќи дека Киев „преголемо се согласил“ на тоа барање.
Трамп, исто така, потврди дека наскоро ќе го испрати својот специјален пратеник Кит Келог во Украина, кој ќе подготви предлог за прекин на борбите. Се очекува Келог да пристигне во Украина на 20 февруари, неколку дена пред третата годишнина од руската инвазија.
Во меѓувреме, Зеленски повикува на „вистински мир и ефективни безбедносни гаранции“, вклучително и членство во НАТО или распоредување мировни сили. Киев стравува дека договор без конкретни воени обврски на САД ќе и овозможи на Русија да се прегрупира за нов напад.
Трамп, иако сака да посредува за завршување на војната, се уште нема презентирано конкретен план за преговори. Путин бара повлекување на Украина од југоисточните региони и го отфрла нејзиниот пристап кон НАТО, додека Зеленски не се согласува на територијални отстапки кон Москва.
Претседателот на Украина најави дека работат на организирање средба со Трамп, додека Трамп минатата недела изјави дека „најверојатно“ ќе се сретне со Зеленски, но ја отфрли можноста да го посети Киев, пишува Гардијан.
