Трамп: Три лица се виновни за војната во Украина – Путин, Бајден и Зеленски
Американскиот претседател Доналд Трамп во понеделникот изјави дека „милиони луѓе се мртви поради три лица“ во војната во Украина – рускиот претседател Владимир Путин, поранешниот американски претседател Џозеф Бајден, за кого рече дека „нема поим“ што прави и украинскиот претседател Володимир Зеленски, пренесе агенцијата Танјуг, повикувајќи се на американски медиуми.
Трамп на новинарите во Овалната соба на Белата куќа, по средбата со лидерот на Ел Салвадор, Најиб Букеле, им рекол дека сè што сака е „да се запре убиството“ во Украина, пренесува Sky News.
„Бајден можеше да го спречи, Зеленски можеше да го запре, а Путин никогаш не требаше да го започне. И се што можам да направам е да се обидам да го запрам, тоа е сè што сакам. Сакам да го запреме убиството, мислам дека правиме добра работа во тој поглед. Мислам дека ќе имате многу добри предлози многу наскоро“, рече Трамп.
Тој го обвини Зеленски дека е „неспособен“, а кога беше запрашан да ги коментира потезите на украинскиот лидер, Трамп рече дека „кога започнуваш војна, треба да знаеш дека можеш да победиш“.
„Не започнувате војна против некој 20 пати поголем од вас. А потоа се надевате дека ќе ви дадат неколку проектили“, рече американскиот лидер.
Тој се присети како прв и дал на Украина ракети Javelin.
