Трамп: Би сакал јас да бидам папа!
Американскиот сајт „Дејли Бист“ денеска пишува дека на новинарско прашање „Кого гледате како папа? Американскиот претседател Доналд Трамп во вторникот без двоумење одговори: „Како папа? Би сакал јас да бидам папа“.
„Тоа би бил мојот избор број еден“, додаде тој.
Новинарот повторно го праша Трамп кого би сакал да види на местото на папата Франциск, кој почина минатиот понеделник, на 88-годишна возраст. „Не, не знам, немам предност“, рече Трамп, а потоа го пофали надбискупот на Њујорк, кардиналот Тимоти Долан.
Трамп се смета себеси за „христијанин кој не припаѓа на некоја посебна група (деноминација)“ во таа религија.
Папа се избира на претстојната конклава од 135 кардинали на Католичката црква со право на глас – најмногу во нејзината историја. Кардиналите помлади од 80 години можат да избираат и да бидат избрани за нов папа. Конклавата – средбата на кардиналите во Систинската капела во Ватикан, затворена за јавноста, почнува следната среда, на 7 мај.
Кардиналите гласаат тајно онолку пати колку што е потребно за папата да биде избран со двотретинско мнозинство. На ливчињата го пишуваат името на кандидатот што го сакаат.
Првото гласање, по сложена процедура, можеше да се одржи само на 7 мај во вечерните часови, а во следните денови можни се до четири гласа дневно – по два наутро и попладне.
По неуспешното гласање, од оџакот на Систинската капела излегува црн чад, а штом ќе биде избран папата, чадот ќе биде бел. Чадот се создава со палење на гласачките ливчиња измешани со хемикалии за да станат црни или бели.
Во 2013 година, папата Франциск беше избран на вториот ден од конклавата, на петтото гласање на кардиналите од почетокот на процесот.
Изборот на папата ќе зависи од тоа дали Католичката црква ќе продолжи по релативно прогресивниот пат што го зацрта папата Франциск или ќе се врати на потрадиционална доктрина, заклучува „Дејли Бист“.
