ТРАГЕДИЈА КАЈ ВАЛАНДОВО: 34-годишен мотоциклист загина по судир со трактор
Триесет и четиригодишен мотоциклист од валандовското село Јосифово вчера попладне го загуби животот како последица од тешките повреди со кои се здобил во сообраќајна несреќа по судир со трактор.
Трагичниот настан се случил вчера околу 14:00 часот на регионалниот пат меѓу селата Јосифово и Пирава, во близина на месноста викана „Железен мост“. Според полицискиот извештај, дошло до судир меѓу мотоцикл „сузуки“, управуван од 34-годишниот С.К. од Јосифово, и трактор „ИМТ“ со приколка, кој го управувал 75-годишниот В.Т. од село Пирава.
Во несреќата, мотоциклистот се здобил со тешки телесни повреди. Тој веднаш бил пренесен во болницата во Валандово, но поради сериозноста на состојбата, итно бил префрлен на лекување во Градската општа болница „Св. Наум Охридски“ во Скопје.
И покрај напорите на лекарите, младиот човек им подлегнал на повредите и починал во 17:30 часот.
Увид на местото на несреќата извршила екипа од ОВР Валандово, а по наредба на јавен обвинител, телото на починатиот е предадено на обдукција за да се утврдат точните причини за смртта.
