Трајковски алармира: Преспанското Езеро тоне – историски минимум на нивото на водата
Нивото на Преспанското Езеро продолжува да бележи драматичен пад и деновиве достигна нов историски минимум. Според податоците што ги објави професорот Дејан Трајковски, за првпат откако се вршат мерењата е пробиена психолошката граница од 841 метар надморска височина, при што моменталното ниво изнесува 840,97 метри, односно 663 сантиметри под референтната кота од 847,60 метри.
Состојбата е особено загрижувачка ако се земе предвид дека во септември, уште пред крајот на хидролошката година, езерото е веќе 19 сантиметри пониско во споредба со лани, кога беше регистриран дотогашниот историски минимум.
Според прогнозите, до декември нивото може да падне дури до -690 сантиметри. Последните две години Преспанското Езеро губи по околу 50 сантиметри од нивото годишно, што во просек изнесува околу 125 милиони кубни метри вода.
„Денеска езерото е цели 55 сантиметри пониско од истиот ден минатата година. Нема никакви индиции дека ќе се забави овој надолен тренд, туку напротив“, вели професорот Трајковски.
Според него, просечната длабочина на езерото сега е околу осум метри, иако најголемиот дел од дното е на длабочина од 9,5 метри.
Оваа состојба уште еднаш ја отвора темата за итни мерки за заштита и управување со водните ресурси, бидејќи Преспанското Езеро е од исклучително значење и за регионот и за животната средина.
