По пауза од повеќе години, повторно се враќа Средното полициско училиште
По повеќегодишна пауза, од следната учебна година повторно ќе се воспостави Средното полициско училиште. Законот за негово основање и функционирање веќе е доставен во Собранието.
Според предлог-законот, во училиштето ќе може да се запишуваат редовни ученици кои завршиле втора година средно образование во кое било средно училиште на територијата на државата.
Заинтересираните кандидати ќе треба да исполнат неколку услови:
да бидат државјани на Република Македонија,
на денот на објавување на јавниот повик да немаат наполнето 18 години,
активно да го користат македонскиот јазик,
да бидат здравствено и психофизички способни,
како и да поминат безбедносна проверка со која ќе се утврди дека не претставуваат безбедносен ризик.
Според предвиденото, училиштето ќе започне со работа на 13 мај 2026 година, во рамките на постојниот Центар за обука во Идризово.
Наставата ќе се одвива по планови и програми кои ќе ги утврди министерот за образование и наука во согласност со министерот за внатрешни работи. Образованието ќе трае две години – трета и четврта година средно училиште. Со тоа, учениците кои завршиле прва и втора година средно образование ќе можат, доколку ги исполнуваат условите и се пријават на конкурсот, да го продолжат своето образование во Средното полициско училиште.
