Топлотен бран ја зафати Македонија: Во Скопје, Велес, Кавадарци и Демир Капија измерени 41 степен
Македонија денеска се соочи со екстремно високи температури. Највисока измерена температура од 41°C е регистрирана во Скопје-Петровец, Велес, Кавадарци и Демир Капија, информираат од Управата за хидрометеоролошки работи (УХМР).
Температури од 40°C се измерени на Зајчев Рид во Скопје и во Гевгелија, додека 39°C се забележани во Битола, Штип и Струмица. Тетово и Виница денеска достигнаа 38°C, Прилеп 37°C, Крива Паланка 36°C, а во Охрид и Претор беа измерени 35°C.
Најсвежо остана на Попова Шапка со 26°C, додека во Лазарополе беа регистрирани 30°C.
До крајот на денот се очекува сончево и многу топло време со слаб до умерен ветер од западен и југозападен правец, а во текот на ноќта ќе преовладува ведро и тивко време.
Прогноза за утре:
Времето ќе биде претежно сончево и уште потопло, со слаб до умерен, а во западните делови повремено засилен ветер од југозападен правец. Минималните температури ќе се движат од 13 до 21°C, додека максималните ќе достигнат од 35 до дури 42°C.
Скопје утре:
Сончево и многу топло со минимална температура до 20°C, а максимална од 41°C.
Топлотен бран до сабота:
Под влијание на топол бран од југ, до 26 јули (сабота) ќе преовладува сончево и исклучително топло време. Температурите ќе бидат над просекот за месецот, а УХМР апелира на внимателност и почитување на препораките за заштита од топлотниот бран.
