ТИТАН Усје: Повеќе од еден месец сме цел на неосновани напади – не сме причина за загадувањето и фактите го потврдуваат тоа
Цементарницата „Титан Усје“ денеска излезе со остра реакција против, како што велат, неаргументираните и тенденциозни напади кон компанијата. Од таму тврдат дека обвинувањата дека тие се главниот загадувач во Скопје се целосно неточни и се обид за извртување на вистината.
Клучниот аргумент на компанијата е фактот што загадувањето во главниот град беше на енормно високо ниво дури и во периодот кога фабриката воопшто не работела поради редовен ремонт.
Од компанијата посочуваат конкретни податоци и датуми кои, според нив, јасно докажуваат дека тие не се причинител за состојбата со воздухот.
Тие додаваат дека иако биле целосно затворени во овој период, мерните станици во Скопје регистрирале концентрации на ПМ10 честички и до 275 микрограми на кубен метар.
„Титан Усје“ потенцира дека работат транспарентно и под строг надзор. Поседуваат А-интегрирана еколошка дозвола и имаат 24-часовен независен мониторинг на оџаците.
Од цементарницата потсетуваат дека нивните интерни гранични вредности се дури и построги од законските, а системот на филтри работи задолжително секогаш кога работат производните линии.
Компанијата апелира нивното работење да се оценува врз база на стручност и закони, а не преку лични и паушални ставови, посочувајќи дека научните студии покажуваат оти најголеми загадувачи се загревањето на домовите и сообраќајот, а не индустријата.
