„ТИШИНАТА ЗБОРУВА ПОГЛАСНО“: Кочани го откажа „Маршот на Ангелите“ за да тагува со семејствата од Кранс-Монтана

Градот кој ја носи лузната на сопствената трагедија, оваа сабота ќе замолчи во знак на почит кон жртвите од Швајцарија. Организаторите од Кочани соопштија дека планираниот „Марш на Ангелите“ нема да се одржи. Наместо тоа, граѓаните се повикуваат на мирна и достоинствена средба за да испратат порака на сочувство до Кранс-Монтана.

Под мотото „Од Кочани до Кранс-Монтана: Тивка почит за загинатите“, жителите на овој град, кој најдобро ја разбира болката на загубата од огнена стихија, ќе се соберат за да запалат свеќа и да постојат во тишина.

Настанот е закажан за сабота, 10 јануари, со почеток во 16:40 часот. Собирното место е Паркот на Револуцијата во Кочани.

Кочани, кој сè уште ги лекува раните од трагедијата во март минатата година, испраќа силна порака до семејствата во Швајцарија. Организаторите потенцираат дека „тишината понекогаш зборува погласно од зборовите“ и дека ова е начин да се поврзат оние што изгубиле со оние што паметат.

Граѓаните се повикани да дојдат со срце што знае да сочувствува, да запалат свеќа и да покажат дека Кочани е со мајките и семејствата на Кранс-Монтана во овие најтешки мигови.