ТикТокер влезе во болница за да докаже дека папата Франциск починал – Ватикан негира се!
Италијанскиот тиктокер Оттаво влегол во болницата „Џемели“ во Рим, каде што папата Франциск бил хоспитализиран поради двострано воспаление на белите дробови, со цел да докаже теорија на заговор која со недели кружи на социјалните мрежи. Тој сакал да докаже дека 88-годишниот папа е мртов, а дека Ватикан ја крие вистината од јавноста.
„Нема никакво обезбедување, ништо. Никогаш не би успеал да влезам толку далеку доколку тој беше овде. Затоа, според мене, папата Франциск е мртов“, изјавил Оттаво, кој има 10.000 следбеници на социјалните мрежи. Сепак, тиктокерот превидел еден важен детал – одделот во којшто влегол не бил оној каде што бил сместен папата, пишува „Гардијан“.
Пред Оттаво, уште еден тиктокер со прекар Ер Бомболино се обидел, неколку дена порано, да влезе во болницата за да ја докаже истата теза. И тој завршил на погрешен оддел.
Ватикан води тивка битка против лажните вести
Откако минатиот месец папата беше хоспитализиран, Ватикан води тивка битка против лажните вести, теориите на заговор и сликите генерирани со вештачка интелигенција што кружат на интернет во врска со неговото здравје.
Лекарите во понеделникот изјавија дека папата повеќе не е во непосредна опасност и дека добро реагира на болничкиот третман, но дезинформациите за неговата здравствена состојба продолжуваат да се шират.
Некои профили на социјалните мрежи четири пати лажно ја објавија неговата смрт откако беше примен во болница, а илјадници лажни фотографии почнаа да кружат на интернет, прикажувајќи го папата Франциск во болнички кревет со кислородна маска на лицето. Минатиот четврток, за првпат откако беше хоспитализиран, папата сними и објави аудиопорака, во која им се заблагодари на оние што се молат за неговото закрепнување. Во пораката тој звучеше задушено, додека се приближуваа три недели од неговиот престој во болница со воспаление на белите дробови. Медиумските извештаи во Италија сугерираат дека една од целите на папината аудиоснимка била одговорот на Ватикан на лажните вести за неговата смрт.
Директорот на Прес-службата на Светиот Престол за „Гардијан“ во вторникот изјавил: „Лажните вести зборуваат сами за себе. Нашите информации ги доставуваме редовно и транспарентно. Рековме дека Папата со таа снимка сакал да им се заблагодари на верниците за нивните молитви во овие недели. Доколку една од целите на таа аудиоснимка била и отфрлање на лажните вести за неговото здравје, тогаш добро – секој може да си донесе сопствен заклучок.“
Оттаво и Ер Бомболино, во заедничко видео на Инстаграм, се бранеа од обвинувањата велејќи: „Ние не сме теоретичари на заговор. Оддадени сме на папата Франциск. Ние само ја бараме вистината. Каде е папата Франциск?“
Ватикан претходно истакна дека одлуката да не се појави во видеото ја донел лично папата Франциск, пренесува Дневник.hr.
