Таравари: Во здравството ќе има вкупно 1.800 вработувања, а потребата за нови договорци е неизбежна
Дваесетте јавни здравствени установи кои веќе имаат завршено нови систематизации, можат веднаш да започнат со вработување на првите 300 специјализанти, соопшти денеска министерот за здравство, Арбен Таравари. Специјализантите, најмногу гинеколози и кардиолози, се дел од првата група која е планирана да биде вработена во склоп на новите реформски мерки за подобрување на здравствениот систем.
Таравари, кој денеска ја посети реновираниот педијатриски пункт на поликлиниката Бит Пазар, истакна дека само во скопските јавни здравствени установи ќе бидат вработени околу 30 специјализанти гинеколози. Во одговор на новинарските прашања, министерот соопшти дека продолжуваат вработувањата во здравството, а планирани се дополнителни 1.180 вработувања на средномедицински персонал и 300 специјализанти во текот на годината.
„Во здравството ќе има вкупно 1.800 вработувања, а потребата за нови договорци е неизбежна, особено за средномедицинскиот кадар кој значително недостасува“, додаде Таравари.
Министерот објасни дека на 30 декември успешно завршиле сите процедури за вработување на приватните специјализанти, во соработка со Министерствата за здравство и за финансии. Иако овој план не бил предвиден во претходните систематизации на јавните здравствени установи, 20 од 108 установи веќе се подготвени да ги вработат првите специјализанти.
„На пример, Здравствениот дом има потреба од седум или десет лекари кои не беа предвидени во првичните систематизации. Со новите систематизации, вработувањата ќе продолжат и останатите установи ќе бидат подготвени да го следат ова“, заклучи Таравари.
