📽️ „АЛБАНЦИТЕ НЕ ГИ ПУШТААТ ЖЕНИТЕ ДА СЕ БРУКААТ ПО КАФЕАНИ“ Петар Богојески им одржа „лекција“ на македонските мажи

Петар Богојески остана на ставот за машка контрола врз жените и во ново видео им се нафрли на мажите кои го критикуваа. Претседателот на Македонски концепт ги посочи Албанците како пример, тврдејќи дека тие ги контролираат своите сопруги и „не ги пуштаат нивните жени да се брукаат по кафаниве и улициве во Скопје“.

– Вие мажите што ме напаѓате, што мажи сте? – праша Богојески во видеото објавено на 3 ноември.

Потоа ги праша дали им одговара да ги пуштаат ќерките, како што рече, „полуголи пред Силбо“ и дали можат да си ги соберат сопругите од кафеаните.

Во истото обраќање, Богојески изјави дека традиционалното семејство ќе ја спаси нацијата и ја повика Македонската православна црква да се изјасни, повикувајќи се на Библијата и на христијанското учење.

Реакцијата на сопругот ја нарече одбрана на достоинството

Повод за видеото беа реакциите на неговото гостување во „Под лупа“ на ТВ Алфа на 2 ноември. Во дебатата со адвокатката Катерина Котеска, Богојески праша дали неверството на сопругата може да се смета за насилство врз сопругот. За реакцијата на мажот во таков случај рече:

– Тоа неговото не е насилство. Неговото е реакција на заштита на неговото достоинство.

Богојески тврдеше и дека феминизмот ги поттикнал жените да го отфрлат машкиот надзор.

Зборувајќи за однесувањето на жени на настан во „Јуроп хаус“ во Скопје, тој рече:

– Еве ви доказ како се однесува жена без машки надзор.

Кога Котеска го праша кој треба да врши надзор врз неа, Богојески одговори дека тоа е задача и обврска на нејзиниот сопруг.

Воената академија ќе ги разгледа изјавите, Митева од ВМРО-ДПМНЕ ги осуди

Воената академија „Генерал Михаило Апостолски“, каде што Богојески е доцент, ќе ги достави до своите надлежни тела иницијативата и материјалите што ги поднесе новинарот Љупчо Златев, уредник на Радио Лидер. Академијата во одговорот до Златев наведе дека телата ќе ги утврдат фактите и ќе оценат дали Богојески ги повредил професионалните и етичките обврски. Од таа оценка зависи дали ќе има мерки.

Остра осуда стигна и од Марија Митева, портпаролка на Владата и претседателка на Унијата на жени на ВМРО-ДПМНЕ. Нејзината реакција има и политичка тежина, бидејќи Богојески ја претставува својата партија како дел од владејачката коалиција.

– Да се зборува за жената како за личност на која ѝ е потребен надзор е недозволиво – порача Митева.

Таа оцени дека Богојески го релативизира насилството во партнерските односи и дека таквите изјави заслужуваат најостра јавна осуда.

Агенцијата за аудио и аудиовизуелни медиумски услуги, по увидот во емисијата, оцени дека Богојески го релативизирал и оправдувал насилството врз жените и децата, а нивната подреденост се обидел да ја претстави како традиционална вредност. За водителката, пак, Агенцијата оцени дека постапила професионално, ги преиспитувала неговите тврдења и барала да ги образложи.

Изјавите ги осудија и членките на Извршниот комитет на Унијата на жени на ВМРО-ДПМНЕ. Генералната секретарка Елена Ивановска порача дека жената има право сама да одлучува за својот живот.

„На жената не ѝ треба машки надзор, ѝ треба почит“, напиша Ивановска.

.

Извор: plusinfo.mk