Таравари: Подготвени сме да разговараме за грбот, химната и другите заостанати прашања
Министерот за здравство од Коалицијата ВРЕДИ, Арбен Таравари, изјави денеска дека неговата партија е подготвена да разговара за сите заостанати прашања од минатото, вклучувајќи ја и темата за промената на државниот грб.
Во одговор на новинарско прашање, Таравари истакна дека Македонија е една од ретките постсоцијалистички земји чиј грб не бил променет, и дека ВРЕДИ е подготвено да иницира дискусии за пакет мерки што ќе ги решат сите нерешени прашања од изминатите 20-30 години.
„ВРЕДИ е подготвен да разговара за се. За жал, во минатиот период повеќе осетливи теми се ставаат под тепих. Ние сме подготвени да разговараме за пакет мерки кои се нерешени во изминатите 20 – 30 години и во пакет да ги решиме, зошто тука да не бидат и грбот и химната и 20 отсто и други етнички прашања ако има и веќе да се фокусираме на економијата, евроинтеграцијата, антикорупцијата,… Тоа ги интересира граѓаните, подобри плати, подобар живот“, изјави Таравари.
Во однос на прашањето што точно треба да стои на новиот грб, министерот нагласи дека партијата ВРЕДИ засега не ја отворила оваа тема и дека ќе се разговара во иднина.
