Таму каде што еден живот завршува, може да почне друг – докторите испратија силна порака
Дарувањето органи претставува највисок чин на човечност и може да значи нова шанса за живот за многу пациенти. Ова е пораката што ја испратија лекарите во рамки на кампањата за промоција на органодарителството, која се реализира под мотото „Органодарителството ѝ дава највисока смисла на човечноста!“.
Медицинските лица кои директно учествуваат во процесот на трансплантација апелираат дека преку дарување органи може да се спасат повеќе животи и да им се помогне на луѓето кои се борат со тешки заболувања.
Директорот на Клиниката за урологија, д-р Башким Шабани, истакна дека голем број пациенти секојдневно живеат во неизвесност поради недостиг на донори.
„Еден донор може да спаси неколку животи. Тоа е чин на солидарност, хуманост и љубов кон животот. Таму каде што еден живот завршува, може да започне друг“, порача Шабани.
Тој нагласи дека разговорот во семејството за оваа тема и информирањето за можностите за дарување органи се клучни чекори за зголемување на свеста во општеството.
Министерот за здравство Азир Алиу оцени дека токму пораките од лекарите, кои секојдневно се соочуваат со пациенти што чекаат трансплантација, се најсилниот повик за поголема солидарност.
„Органодарителството е длабока човечка одлука со која надежта продолжува да живее. Наша обврска е да го развиваме системот, да ја зголемуваме довербата и да создадеме култура во која дарувањето органи ќе се препознае како врвен чин на емпатија и почит кон животот“, изјави Алиу.
