„Таа е уценета и врзана – со морков и со стап“: ВМРО-ДПМНЕ обвинува дека Арсовска работи по нарачка на ДУИ и СДС
По објавата на градоначалничката на Скопје, Данела Арсовска, во која таа остро го критикуваше лидерот на ВМРО-ДПМНЕ, Христијан Мицкоски, следуваше реакција од партијата, во која се тврди дека нападите се извршуваат по „нарачка од СДС и ДУИ“.
Во соопштение од Центарот за комуникации на ВМРО-ДПМНЕ, Арсовска се обвинува дека е „главен инструмент на ДУИ во борбата против ВМРО-ДПМНЕ“ и дека е „уцнетa и контролирана преку лични и бизнис интереси“. Според партијата, нејзините изјави не се самостојни, туку „глас на интересите на СДС и на Али Ахмети“.
„Секој што имал средба со неа гледа дека нешто не е во ред – има внатрешен немир, политичка дезориентација“, стои во соопштението. ВМРО-ДПМНЕ тврди дека Арсовска се активира исклучиво пред избори и тоа секогаш „против ВМРО“.Во реакцијата се додава и дека нејзините јавни настапи се „дрски и невоспитани“, а нејзините наводни пријави против лица од МВРО-ДПМНЕ се обвинуваат како обид да се одвлече вниманието од „милонски криминал потпишан со нејзина рака“.
„Скопје ќе се врати на скопјани, без ДУИ, без Ахмети, без политичари од Сарај и без Данела“, се вели на крајот од соопштението, во кое партијата изразува уверување дека по локалните избори градот ќе добие „нова енергија, силни реформи и видливи проекти“.
