Свински бубрег пресаден на мозочно мртов човек: Функционирал нормално два месеци
Десетици лекари и медицински сестри молчејќи се наредени низ болничкиот коридор за да го прослават фактот дека бубрегот од свиња нормално функционирал во човек без мозочна активност два месеци.
Драматичниот експеримент заврши во средата кога хирурзите од NYU Langone Health го отстранија бубрегот на свињата и го вратија донираното тело на Морис Милер на неговото семејство за кремирање.
Ова е најдолгиот период досега во кој бубрегот на генетски модифицирана свиња функционирал во човек, иако мозочно мртов.
Научниците веруваат дека научиле клучни лекции од истражувањето со мртвите, кои се подготвуваат да ги споделат со Управата за храна и лекови (ФДА) со надеж дека евентуално ќе ги тестираат свинските бубрези на живи луѓе.
„Тоа е комбинација од возбуда и олеснување. Два месеци се долго време за да се одржи бубрегот од свиња во толку добра состојба. Тоа ви дава голема самодоверба за следните обиди”, рече др. Роберт Монтгомери, хирургот за трансплантација кој го водеше експериментот.
Тој самиот е примател на трансплантација на срце и смета дека трансплантацијата од животно на човек е метод за ублажување на недостигот на органи во САД.
Повеќе од 100.000 луѓе се на национална листа на чекање, на повеќето од нив им треба бубрег, а илјадници ќе умрат чекајќи.
Обидите за таканаречена ксенотрансплантација беа неуспешни со децении бидејќи човечкиот имунолошки систем веднаш го уништува туѓото животинско ткиво.
Сепак, се случи промена кога почнаа да пробуваат органи од генетски модифицирани свињи кои повеќе личат на човекот.
Минатата година хирурзите од Универзитетот во Мериленд се обидоа да спасат човек кој умира со свинско срце, но тој преживеа само два месеци бидејќи органот откажал од не сосема јасни причини.
