Сведоштво на ревизорот откри сериозни неправилности на Клиниката за онкологија
На судењето за случајот „Онкологија 2“, кој се однесува на злоупотреби на буџетот на Клиниката за радиотерапија и онкологија, сведочеше претставник на Државниот завод за ревизија, кој посочи на долгогодишни неправилности во финансиското и материјалното работење на клиниката.
Сведокот посебно ја истакна проблематиката со планирањето и дистрибуцијата на биолошката терапија – еден од најскапите сегменти во онкологијата. Наместо одлуките да ги носи стручен колегиум на лекари, планот за набавка се правел според минатите потрошувачки, без анализа на потребите на пациентите и без проверка дали има доволно лекови за сите. Дополнително, ревизорот укажа на разлики во евиденцијата помеѓу тоа што аптеката го издавала и што организациските единици пријавувале како примено. Причина за тоа било што дел од терапијата се набавувала „на реверс“, без договор и утврдена цена.
Во 2021 година, одобрение за терапија давал медицинскиот директор, без да се знае дали лековите се доволни за сите пациенти, што отвора ризик од селективен пристап. Клиниката немала усвоени медицински протоколи за критериумите кои пациенти имаат право на биолошка терапија, што, според ревизорот, е спротивно на законите и создава нееднаквост меѓу пациентите.
Сведокот исто така укажа дека набавките понекогаш се вршеле пред да заврши постапката за јавна набавка и покрај тоа што многу лекови имаат ексклузивни продавачи. Ова го нарушува принципот на конкуренција и остава простор за злоупотреби. При редовниот попис, ревизорите не можеле точно да утврдат со што располага клиниката – од опрема, возила, нематеријални средства до лекови и материјал, ниту да ги усогласат со сметководствените книги, што ја прави финансиската документација недоверлива.
Во случајот „Онкологија 2“, поранешните директори Нино Васев и Нехад Нухи се обвинети дека во периодот од 2018 до 2022 година незаконски набавувале лекови, ги прикривале преку фиктивни тендери и присвојувале дел од терапијата, со што го оштетиле државниот буџет за речиси 36 милиони евра. Двајцата обвинети ја негираат вината и тврдат дека процесот е политички мотивиран.
