Сведоштво на Македонка евакуирана од Израел: Бевме давеници, чекавме сламка за спас!
Велешанката Ѓурѓа Рушкова и нејзиниот син во средата беа евакуирани од Израел со лет до Атина. Тие беа дел од групата 50 верници од различни држави кои беа на аџилак во светата земја. Таа за МИА ја раскажува голготата низ која поминале со нејзиниот син за да се вратат дома, откако се случи конфликтот на Блискиот Исток.
Рушкова за МИА раскажува дека биле во неверување дека всушност се случува вистинска војна, и дека ништо не наговестувало дека ќе се случи такво нешто.
Вели дека во хотелот каде што биле сместени имало луѓе од многу националности, а по два дена чекање одлучиле сами со такси да го напуштат хотелот и да отидат на Аеродромот во Тел Авив. Ја контактирала и македонската амбасада, со која била во постојан контакт. Таа била евакуирана со авион од Тел Авив до Атина, потоа со автобус до Солун.
Таму ги земал македонскиот конзул кој со автомобил ги донел до македонската граница, каде ги чекале луѓе од МНР.
„Јас купив две авионски карти, за две различни дестинации да можеме само да излеземе од Ерусалим, летовите се откажуваа моментално… Имавме купено карти да одиме до Јордан , да летаме од Јордан, меѓутоа и тоа таму пропадна. Ги информирав во македонската амбасада и кажав јас и мојот син ќе бидеме на аеродромот во Тел Авив и ако нешто се јави да не контактираат….Додека бев на таа линија добив повик од македонската амбасада во Тел Авив и ме информираа дека има лет за Атина и дали ќе сакам да го прифатам тој лет. Јас се воодушевив, реков да, да…“, вели Ѓурѓа Рушкова
