Сведоштво на братот на загинатиот Андреј Панов: Во „Пулс“ имало еден излез, без противпожарна опрема

Кристијан Панов од Кочани, брат на загинатиот Андреј Панов, во своето сведоштво за трагедијата во дискотеката „Пулс“ изнесе сериозни тврдења за условите за работа, безбедноста и настаните кобната ноќ.

Тој изјави дека повремено работел хонорарно во дискотеката, за што добивал 1.500 денари по вечер, пари кои, како што рече, им биле исплаќани на крајот од работното време. Неговиот брат Андреј работел како шанкер и, според негово сознание, бил платен околу 2.000 денари дневно.

Панов тврди дека пиротехнички средства се користеле и пред 16 март, а неодамна, пред трагичниот настан, настапувал диџеј од Грција со танчерки кои користеле запаливи реквизити слични на факели. Во дискотеката, според него, имало само еден влез и излез, кој не бил јасно означен со светлосна сигнализација, а тој лично не забележал присуство на противпожарни апарати.

За време на настаните, како што изјави, обезбедувањето било постојано присутно и било составено од лица од Кочани, кои стоеле пред влезот, продавале билети и ставале печати на рацете на посетителите. Наведе дека билети продавал Тодор Јованов, кој, според неговите зборови, продавал и на малолетни лица. Во дискотеката, како што тврди, имало и малолетници, а полицијата повремено доаѓала.

Кристијан Панов опиша и што се случувало кобната ноќ. Тој пристигнал во дискотеката околу 02:20 часот, за роденденска прослава на негов пријател. По краток престој внатре, излегол надвор да запали цигара, кога забележал дека влегуваат полицајци. Неколку секунди подоцна, како што рече, настанал целосен хаос.

„По 30–40 секунди одеднаш сите почнаа да трчаат. Настана стампедо, луѓе врз луѓе, најмногу заглавени меѓу двете врати“, сведочеше Панов, додавајќи дека концертот на групата ДНК бил во тек и дека некој од бината повикал публиката да излезе надвор.

Во паниката, како што рече, повеќе лица се обидувале да помогнат, а и самиот тој влегол назад во објектот за да го бара брат му. Внатре, според неговото сведоштво, имало густ чад и многу тела без свест. Тој налетал на пожарникар, но немало доволно осветлување, па го користел мобилниот телефон.

„Го најдов брат ми на самиот праг. Имаше многу тела. Ги тргав за да стигнам до него“, изјави Панов.

Андреј Панов бил префрлен во болница, каде, според неговиот брат, биле направени обиди за реанимација, но безуспешно. „Останавме сами во просторијата, се обидував да го реанимирам, но веќе беше доцна“, сведочеше тој.

Панов наведе дека видел поединци како помагаат на повредените, но тврди дека во клучните моменти немало доволно организирана помош.