Судски совет ги потврди оставките на членовите Радева-Стефкова и Герасимовски
Судскиот совет ги потврди оставките на членовите Мирјана Радева-Стефкова и Зоран Герасимовски по што формираше комисија за избори на нови членови која ќе ја предводи членот Ханиф Зендели.
– Имајќи ги предвид последните превирања, сметам дека треба да си поднесам оставка од проста причина што сметам дека поголем придонес ќе дадам како судија во Апелацискиот суд во време кога сите судови се пренатрупани со предмети, отколку како член на Судскиот совет, рече Герасимовски.
Радевска-Стефкова имала определени моменти на разидување помеѓу нејзиниот став и заедничкиот став на Судскиот совет.
– Пример е одбивањето на Судскиот Совет да ги достави списите до Врховниот суд како и првите постапки кои што беа водени од страна на Судскиот совет во однос на избор на судии во повисок суд. Потоа следуваше седницата во април кога дојде до разрешување на претседателот кое според мене е незаконито. Мене ми пречеше што таа одлука е дадена без образложение, затоа што сметам дека Судскиот совет сите свои одлуки треба да ги образложи, рече таа.
