Судот ќе реши чија е Алијанса за Албанците
И двата разединети табора го користат истото партиско седиште, тврдат дека го имаат партискиот печат, како и мнозинството делегати во партијата.
Кому ќе припадне Алијансата за Албанците, околу еден месец пред изборната трка, треба да одлучат институциите.
Од крилото на Арбен Таравари, велат дека вчера до Основниот суд Тетово доставиле нотарски изјави на членови на Централното собрание, како потврда дека не биле на состанокот, свикан од Села. Со тоа, велат дека судски ќе докажат дека Собранието на кое се повикува Села немало двотретинско мнозинство да закаже конгрес и да го разреши Таравари.
Рамадани дополни дека повеќе нема да информираат околу внатрешната поделба во Алијанса, оставаме на судот, вели тој, да одлучи кому ќе припадне партијата, а најавија дека ќе покренат и тужба за фалсификат на конгресот на Села.
Од таборот на Села, пак, денеска молк. Партиски извори деновиве брифираа дека материјалите од вонредниот конгрес ќе ги пратат во Централен регистар, за Села да биде регистриран за нов претседател на Алијансата за Албанците.
Поделбата во партијата, започна откако Таравари објави дека на изборите ќе настапи заедно со опозиционите партии на Албанците. Ваквиот став наиде на остра критика на Села, кој рече дела одлуките треба да се носат и објавуваат на партиски седници, а не на социјалните мрежи.
Се редеа средби, вонредни конгреси како и обвинување меѓу двата табора. Крајниот збор сепак ќе го има судот.
