Судењето за пожарот во „Пулс“ ќе се одржува во Основниот кривичен суд Скопје – одлучи Врховниот суд

Советот за казнени дела при Врховниот суд на Република Северна Македонија денеска донесе одлука Основниот кривичен суд Скопје да биде стварно и месно надлежен за водење на судскиот процес за трагичниот пожар во дискотеката „Пулс“ во Кочани.

– Советот за казнени дела при Врховниот суд, денес на 25 јуни 2025 година, донесе решение со кое за надлежен суд за постапување по предметот поврзан со пожарот во „Пулс“ се определува Основниот кривичен суд Скопје – се наведува во соопштението на Врховниот суд.

Согласно обвинителниот акт, 34 физички и три правни лица се обвинети за тешки дела против општата сигурност. Меѓу нив се сопственици на локали, управители, инспектори, градоначалници, членови на обезбедување и државни службеници.

Поради недостиг на доволно докази, постапката е запрена за 11 лица, меѓу кои се и двајца поранешни министри.

Во трагедијата што се случи на 16 март годинава во дискотеката „Пулс“ животот го загубија 62 лица, меѓу кои и шест деца, а над 200 лица беа повредени.

Судењето за овој случај се очекува да започне наскоро во Основниот кривичен суд во Скопје.