Судење „Онкологија“: Пациентка примила терапија која не требало да ја прими бидејќи се наоѓала во терминална фаза

Случајот „Онкологија“, во кој обвинети се поранешниот директор на Клиниката за онкологија Нино Васев и онколозите Симонида Црвенкова и Драган Јакимовски, продолжи денеска со сведочења на вештаци од Словенија за несовесно лекување на пациенти.

Според вештачењата, на една пациентка била дадена терапија која не требало да ја прими бидејќи се наоѓала во терминална фаза, кога лекувањето може да ја влоши нејзината состојба. Во други случаи, онколошката терапија била погрешно дозирана поради тоа што не биле направени целосни проценки на здравствената состојба на пациентот.

Одбраната го оспорува словенечкото вештачење. Адвокатот на обвинетата докторка Симонида Црвенкова тврди дека тоа не може да биде доказ, бидејќи е изготвено врз основа на нецелосна документација и користи протоколи кои не се дел од здравствениот систем на Македонија.

Следните рочишта за сослушување на вештаците од Словенија се закажани во текот на неделата. Според најавената динамика, кон крајот на март ќе започне и сослушувањето на вешти лица од Србија кои работеле вештачења за Обвинителството.