Студентите можат да аплицираат за субвенциониран оброк до 5 декември
Министерството за образование и наука ги информира студентите дека рокот за пријавување за правото на субвенциониран студентски оброк за академската 2025/2026 година започнува денеска и трае до 5 декември 2025 година.
Правото на субвенциониран студентски оброк го имаат сите редовни студенти на додипломски студии со месечен приход помал од минималната нето плата, како и студентите запишани на постдипломски и интегрирани студии на државните и приватните универзитети во државата.
Студентите кои ги исполнуваат условите и досега не аплицирале, можат да го сторат тоа електронски преку порталот: https://e-uslugi.mon.gov.mk.
Условите и критериумите за остварување на правото се достапни на следниот линк: https://mon.gov.mk/mk-MK/konkursi-i-stipendii/konkursi-mon/javen-povik-z. За поддршка при аплицирањето, студентите можат да се обратат на е-пошта: subvencioniran.obrok@mon.gov.mk.
Министерството исто така нагласува дека студентите на кои им било прекинато правото на субвенциониран оброк, а сметаат дека ги исполнуваат условите, можат повторно да аплицираат. Овој рок е отворен и за студентите кои не аплицирале во претходните активни рокови.
