Студен бран ја погоди Македонија: По обилен дожд, утре можен е снег и во некои населени места, температурите паѓаат под нулата за викендот

Студен бран од северните делови на континентот донесе драстичен пад на температурите, обилни врнежи од дожд и прв снег на планините низ Македонија. Управата за хидрометеоролошки работи (УХМР) најавува дека утре постојат услови врнежите од дожд да преминат во снег и во некои од повисоките населени места, а за време на викендот се очекуваат утрински температури под нулата.

Времето денеска е облачно и студено, со максимални температури кои се движат во интервал од само 4 до 11 степени. Врнежите од дожд се пообилни, а на планините веќе се формира првата снежна покривка. Дува умерен до засилен ветер од северен правец.

Слично време се очекува и утре, кога температурите дополнително ќе се спуштат. Максималната температура во Скопје ќе достигне само 9 степени, во Прилеп и Охрид 7, додека во Маврово ќе биде најмногу 4 степени, со минимална температура од -2 степени.

Според најавите на УХМР, од овој влажен и студен бран, на повеќе места во државата се очекува да наврнат вкупно над 50 литри дожд на метар квадратен.

За време на викендот, времето ќе се стабилизира и ќе биде претежно сончево, но утрата ќе бидат многу студени со температури кои ќе се движат од -2 до 6 степени. Дневните температури, сепак, ќе бидат во благ пораст и ќе достигнат до 18 степени во недела.