Струга сè уште без вода за пиење: Матноста во изворот „Шум“ опаѓа, но е далеку од дозволеното
Иако нивото на заматеност на водата во изворот „Шум“ постепено се намалува, таа и понатаму е здравствено неисправна и забранета за употреба. Најновите анализи на Центарот за јавно здравје (ЦЈЗ) Охрид потврдуваат дека параметрите се сè уште далеку над максимално дозволените граници.
Според податоците на д-р Лидија Симоноска, специјалист по хигиена и здравствена екологија, првичните мостри земени на 9 февруари покажале загрижувачки 28,56% матност. Последните мерења од средата (11 февруари) покажуваат подобрување, односно пад на 10,17%, но тоа е сè уште критично високо.
„Водата низ целиот град е со висока матност. Иако има присуство на хлор, таа не е безбедна додека нивото на заматеност не падне под 1,5%,“ предупредува д-р Симоноска.
Експертите од ЦЈЗ Охрид сметаат дека главната причина за енормното загадување се активностите на каменоломот лоциран во непосредна близина на извориштето.
Случајот веќе добива правна разрешница. Основното јавно обвинителство Струга оформи предмет за да се испита дали се сторени кривични дела против животната средина и природата.
Водата од струшкиот водовод е под строга забрана за пиење и лична хигиена уште од неделата. Жителите се упатени да користат флаширана вода до официјалното известување за исправност од надлежните институции
