Стратешка реформа за фискална стабилност и економски развој – нов закон за работно ангажирање
Директорката на Управата за јавни приходи м-р Елена Петрова присуствуваше на јавната расправа за предлог Законот за работно ангажирање на лица, кој се разгледуваше на Комисијата за економски прашања, труд и енергетска политика во Собранието на Република Северна Македонија.
Директорката Петрова пред Комисијата ги презентираше ставовите на Управата за јавни приходи како еден од главните носители во примената на Законот и даде конструктивни предлози за подобрување на текстот на Законот во насока на подобра имплементација на истиот. Беа дадени предлози за воведување систем и процедури кои ќе функционираат ефикасно, ќе овозможат лесно исполнување на законските обврски на работодавачите и ќе обезбедат база на податоци за следење и континуирано подобрување на економските политики.
Целта е, како што беше појаснето, да се обезбеди правна заштита за работниците, да ги гарантира нивните права, социјална и здравствена заштита, јасно дефинирани обврски при ангажирање на работниците и ефикасен регистар за пријава на работниците, формализација на непријавени работници, а со тоа и повеќе приходи по основ на даноци и придонеси.
Оваа реформа се очекува да има директно позитивно влијание врз секторите земјоделство, угостителство и домашни услуги – индустрии каде потребата од работна сила за сезонска и повремената работа се неопходни, но досега нерегулирани.
Како што беше презентирано од страна на пратениците – предлагачи, целта на оваа законска иницијатива е да се намали неформалната економија, да се зголемат јавните приходи и да се придонесе кон подобрување на условите за работниците и работодавачите. Предлог законот е во согласност со стратешките цели на државата за поддршка на формализацијата на неформалната економија, согласно „Стратегијата за формализирање на неформалната економија“ за периодот 2023-2027 година. Законското решение е креирано во согласност со искуствата од земјите од регионот и Европската унија, а неговата примена ќе се потпира на воспоставување на регистар за евиденција на работно ангажирање, кој ќе биде усогласен со постојните системи и ИТ мрежи.
Донесувањето на овој Закон значи дека работниците, кои досега беа без заштита, ќе добијат безбедност и правна сигурност, а работодавачите ќе имаат поедноставени процедури за ангажирање без административни пречки.
Со овој закон, Република Северна Македонија поставува нови стандарди во борбата против неформалната економија и гради праведно и одржливо деловно опкружување.
