Столтенберг: Предложив пакет од три елементи, за приближување на Украина кон НАТО
Овој Самит е историски самит затоа што веќе направивме договор кој гарантира дека Шведска ќе стане полноправна членка на Алијансата. Ова утрово во Вилнус го изјави генералниот секретар на НАТО Јенс Столтенберг на почетокот од дводневниот самит. Тој најави дека на овој самит ќе бидат донесени важни одлуки.
„Јас предложив пакет од три елементи со попрактична поддршка, со повеќегодишна програма за обезбедување целосна интероперабилност меѓу украинските сили и силите на НАТО. Ова ќе ја приближи Украина до НАТО. За да ги зајакнеме нивните политички врски со формирањето на Советот на НАТО за Украина, утре ќе го имаме инаугуративниот состанок со претседателот Зеленски, а потоа ќе го отстраниме условот за Акционен план за членство. Ова ќе го претвори процесот за членство на Украина од процес во два чекора во процес во еден чекор. Значи, сето ова ќе испрати позитивна и силна порака“, рече Столтенберг.
Изрази надеж дека сојузниците ќе се согласат за поамбициозно ветување за инвестиции во одбраната, каде што 2% од БДП за одбраната ќе бидат минимум.
„И на крај, со нетрпение очекувам да им посакам добредојде на нашите индо-пацифички партнери на овој самит. Ова ќе покаже дека безбедноста не е регионална безбедност е глобална, и затоа ги поздравувам партнерите од Австралија, Нов Зеланд, Јужна Кореја и Јапонија“, заклучи Столтенберг.
