СТОЧАРИТЕ ПРЕД ВЛАДА: Ако нема субвенции, на 26 декември ја блокираме цела држава со трактори!
Претставници на Сојузот на одгледувачи на овци и Конфедерацијата на слободни синдикати (КСОМ) денеска излегоа на протест пред Владата, порачувајќи дека македонското сточарство е пред колапс поради неисплатените субвенции.
Револтираните сточари од цела држава упатија последен аларм до премиерот и претседателката, нагласувајќи дека трпението е потрошено.
Насер Џемаили, претставник на сточарите, истакна дека државата целосно ги заборавила земјоделците и сточарите, иако Македонија историски се препознавала како силна сточарска земја.
„Година дена чекаме субвенции, а веќе две години нема редовна исплата за некои гранки. Сакам да ѝ порачам на Владата дека нè оставија на страна. Баравме средби и со премиерот и со претседателката, но одговор нема. Немаме веќе работници, нема кој да чува стока. Ако не добиеме пари, на 26 декември сите сточари излегуваат со трактори низ цела држава“, изјави Џемаили.
Одгледувачите на овци се жалат дека биле изманипулирани со неколку ветени рокови кои не биле испочитувани. Милена Величковиќ, сточар од Кумановско, вели дека по последното ветување дека парите ќе легнат до 20 декември, веќе немаат ниту ден толеранција.
„Револтот расте со причина. Чекавме да помине летото, изборите, ни велеа дека решенијата се потпишани и пратени до Трезор, но повторно ништо. Не е прв пат да ни ветат и да не одржат збор. Функционираме со огромни потешкотии“, вели Величковиќ.
Од здружението „Современ сточар“, Марјан Стојановски предупреди дека сточниот фонд е веќе уништен и дека ова е „последната генерација“ на сточари во земјата.
„Дојде 2025 година, а ние уште ги чекаме парите за 2024. Имаме куп проблеми кои никој не ги решава. Доколку до петок не се исплатат субвенциите, планираме протести како во Грција – ќе блокираме секаде“, порача Стојановски.
Сточарите се децидни дека нивната намера не е да напаѓаат никого, туку само да ги остварат своите права и да го спасат егзистенцијалниот минимум за своите семејства.
