Стојановски: Без разлика дали играме на природна или вештачка трева, нашите фудбалери се професионалци!
Македонската фудбалска репрезентација утре ќе го одигра четвртиот натпревар во квалификациите за Светското првенство 2026, на гостински терен против селекцијата на Казахстан. Натпреварот ќе се игра на Астана Арена, со почеток во 16 часот по македонско време.
„Црвено-жолтите“ ќе бидат предводени од помошникот Роберт Стојановски, бидејќи селекторот Благоја Милевски ќе го пропушти дуелот поради суспензија од два жолти картона.
Иако мечот ќе се одигра на терен со вештачка трева, Стојановски уверува дека националниот тим е фокусиран и максимално подготвен:
– Без разлика дали играме на природна или вештачка подлога, нашите фудбалери се професионалци и подготвени на секакви услови. Казахстан има солидна селекција, но нашата цел е јасна – одиме по победа, изјави Стојановски.
Македонија во досегашниот тек од Ј-групата има пет освоени бода од три натпревари и е без пораз. Од друга страна, Казахстан има една победа и еден пораз од два одиграни меча.
Националниот тим во Астана допатува со оптимизам и надеж дека ќе продолжи со добрите резултати и ќе остане во трка за пласман на Мундијалот во 2026 година.
