Станови, апартмани, земјиште – имотот на Мијалков наскоро ќе биде ставен на продажба
Остатокот од одземениот имот на Сашо Мијалков во предметот „Империја“ наскоро ќе биде ставен на продажба, соопштија од Агенцијата за управување со одземен имот за „Скопје1“. Според проценките, државата очекува да инкасира околу 21,45 милиони евра, што е за девет милиони евра помалку од сумата што ја соопшти Обвинителството при спогодбата со поранешниот шеф на УБК за намалена затворска казна.
На продажба ќе бидат понудени станови и гаражни места на Водно (каде што Мијалков живееше), апартмани во хотелите „Панорама Резиденс“ и „Парк“ во Охрид, градежни парцели и деловен простор во центарот на Скопје.
„Во најскоро време ќе биде објавен јавен оглас за продажба на останатиот дел од конфискуваниот имот по оваа пресуда. На продажба ќе бидат:
Вкупната вредност на овие недвижности, според проценката на Министерството за правда – Биро за процени, изнесува 21,45 милиони евра, што ќе биде минималниот износ што ќе се префрли во државниот буџет“, информираат од Агенцијата за одземен имот.
Досега, државата успеала да наплати 332.276 евра од продажбата на три стана и гаража на Водно, кои ги купи компанијата „Бест веј инвестмент“, во сопственост на Јордан Мијалков.
Најголемиот дел од имотот, вклучувајќи повеќе од 20 станови на истата локација на Водно, како и парцела во близина на хотелот „Мериот“, ќе биде понуден на продажба во оваа фаза.
Во јули 2022 година, Сашо Мијалков призна вина и се спогоди со обвинителката Лиле Стефанова во рамки на истрагата „Империја“, која се однесуваше на перење пари.
