ССНМ се приклучува на утрешниот работнички протест за зголемување на платите
Самостојниот синдикат на новинари и медиумски работници (ССНМ) ја потврди својата одлука за учество на работничкиот протест закажан за утре, со цел да се побара итно зголемување на минималната плата и корекција на примањата во медиумскиот сектор.
Одлуката за приклучување беше донесена на седница на Извршниот одбор на синдикатот, при што членовите беа повикани активно да ги поддржат иницијативите насочени кон подобрување на економската состојба на работниците. Протестот, кој го организира Сојузот на синдикати, ќе започне во 17 часот и, како што посочуваат од ССНМ, ќе биде легитимен, мирен и достоинствен начин за изразување на работничкото незадоволство.
ССНМ ги поткрепува своите барања со резултати од истражување спроведено во 2024 година во соработка со Институтот РЕСИС. Според податоците, повеќе од половина од вработените во медиумите примаат плата пониска од државниот просек, додека околу една третина од новинарите, камермани, монтажери, дизајнери и други медиумски професионалци заработуваат минимална плата.
„Ваквите бројки укажуваат на сериозен и долготраен структурен проблем во медиумската индустрија, кој директно влијае врз достоинството на трудот и квалитетот на медиумската работа“, велат од ССНМ.
