„Совет на Амбасадори“ го поздравува објавениот Извештај за реформи на ЕУ

Здружението за надворешна и меѓународна политика „Совет на Амбасадори“ го поздравува објавениот Извештај за реформи на ЕУ, изработен од француско – германска група на експерти, претставен од Ана Лирман, државен министер за Европа на СРГ и Лоренс Бон, државен секретар за европски прашања на Франција, водачи на групата составена од дванаесет експерти, наречена, „Групата на дванаесетмината“, формирана во јануари 2023. Извештајот препорачува паралелно одвивање на ЕУ внатрешни реформи, законодавство и проширување, со симболичен наслов, „Едрење на високи бранови – реформи и проширување на ЕУ во 21ви век“.

Суштината на извештајот се сведува на тоа дека „ЕУ проширувањето и ЕУ реформите можат да одат „рака под рака“. (Ана Лирман).

Советот на Амбасадорите посебно ја поддржува изнесената заложба во Извештајот, 2030 година да се определи како јасна и цврста временска координата за следно проширување на Европската Унија, како и препораката дадена до следната Европска Комисија, таа да се посвети на целта „2030“ и навреме да ја усогласи постапката за пристап кон проширувањето.

Воедно, сметаме дека овие оптимистички препораки од групата на експерти и постојаните декларации од високи и највисоки претставници на Европската Унија и на нејзините земји – членки да се преточат во одлука на највисоките тела на ЕУ, со јасни обврски за земјите – кандидати, но и за самата ЕУ. Советот на амбасадори особено ги цени препораките, единствено самиот прием да биде врзан со едногласност на сите земји – членки, а во текот на процесот на проширување да се одлучува со „квалификувано мнозинство“, и ЕУ да преферира проширување „втемелено на заслуги“, концепт, кој што дури шестпати се наведува во самиот Извештај.

Имајќи ја предвид нашата стратегиска и консензуална определба за полноправно членство во Европската Унија и заокружување на процесот на македонската европска интеграција, Советот на амбасадори се залага за отворена, продлабочена и проширена дебата во македонската јавност по сите изложени точки од Извештајот на француско – германската работна Група на експерти за реформа на ЕУ.

Советот на амбасадори будно ги следи сите дебати во рамките на Европската Унија за преосмислување на процесот на европска интеграција и повикува на отворена дискусија за македонскиот позиција во овој процес, со сѐ сите придобивки, можностите и предизвиците што го следат.