Софија со писмо до ЕУ: Македонија чека и провоцира; Сиљановска: Судовите не се под туѓа јурисдикција
Бугарскиот министер за надворешни работи, Георг Георгиев, испратил писмо до своите колеги од земјите-членки на Европската унија во кое ја обвинува Македонија дека „чека“ наместо да „работи“ на исполнување на своите обврски, што е причина за статус-квото во преговорите. Писмото предизвика остри реакции во Скопје, како од претседателката, така и на внатрешно-политичката сцена.
Во дописот, Георгиев изразува загриженост за, како што вели, одбивањето на земјава да ги спроведе обврските, но уверува дека Софија нема нови услови. Сепак, тој оценува дека иницијативата поднесена до Уставниот суд од поранешната пратеничка Лилјана Поповска за оценка на уставноста на Протоколот од Договорот за добрососедство е „непотребна провокација и правно апсурдна постапка во координација со владејачката ВМРО-ДПМНЕ“.
На ваквите наводи, шефицата на државата, Гордана Сиљановска-Давкова, одговори дека македонските судови не се под јурисдикција на политичари од соседството. „Нашите судови не се под јурисдикција на политичари од соседството и одлуките не се коментираат“, изјави претседателката.
Истовремено, таа ја отфрли и идејата на СДСМ за носење нова собраниска декларација за „црвените линии“ во преговорите, оценувајќи ја како непотребна.
„Не разбирам што значи црвена линија во овој поглед, особено не ја разбирам аргументацијата дека доколку сепак соседот посегне по вето, ние тогаш ќе ги прекинеме преговорите. Ако лидерите на сите партии зборуваа во еден глас, сигурно поинаку ќе се однесуваа кон нас“, рече Сиљановска-Давкова, потсетувајќи на предлогот за уставни измени со одложено дејство, кој, како што рече, првиот човек на Европската Унија, Кошта, го оценил како „извонреден потег“.
На ваквиот став на претседателката експресно реагираа од СДСМ, обвинувајќи ја дека не се однесува како претседател на сите граѓани.
„Наместо државнички пристап, наместо да ја поддржи иницијативата за национален консензус во клучен момент за евроинтеграциите, таа ја нападна идејата на СДСМ за резолуција со јасно дефинирани државни позиции и црвени линии“, се вели во соопштението на социјалдемократите.
