„Не сум виновен, синот ми ги крадеше клучевите“, се бранеше таткото на Васил на стартот на судењето

„Не се чувствувам виновен и не разбирам што ми се става на товар“. Со овие зборови, Зоран Јованов, татко на Васил Јованов кој ја предизвика тешката сообраќајна несреќа во која загина младата Фросина, денеска во Основниот кривичен суд ја отфрли вината за делото „загрозување на безбедноста во сообраќајот“.

Обвинителството, во еден од ретките вакви случаи во судската пракса, ќе се обиде да докаже дека таткото, иако не бил директен учесник во сообраќајот, придонел неговиот полнолетен син да предизвика опасна состојба.

„Во ова судење ќе се увиди дека во случајот станува збор за ноторен факт дека татковата љубов кон синот единец била голема, но резултирала со несреќна попустливост кон синот кој се оддал на пороци“, истакнаа од Обвинителството, додавајќи дека обвинетиот е примерен офицер во армијата кој досега не бил во судир со законот.

Одбраната, предводена од адвокатот Дуковски, бурно реагираше на ваквите наводи, тврдејќи дека родителот не може да одговара за постапките на својот полнолетен син. „Неговиот клиент никогаш не му го има дадено возилото на синот, туку тој ги крадел клучевите“, рече Дуковски. Најавено е дека и синот Васил ќе сведочи на некое од следните рочишта.

Првото рочиште помина во тензична атмосфера, а од судницата беше отстранет Тодор Кулаков, таткото на починатата Фросина. Тој реагирал поради фактот што истата судијка ги води и постапката против синот и против таткото.

Обвинителството го измени обвинителниот предлог врз основа на нови докази. За ова кривично дело, максималната предвидена казна е една година затвор.