Собранието усвои зголемување на пензиите – од септември следува линеарен раст од 2.000 денари
Собранието вечерва, во рамки на 63. седница, со 79 гласа „за“, без ниту еден глас „против“ или „воздржан“, ги усвои измените на Законот за пензиско и инвалидско осигурување. Со овие измени се предвидува линеарно зголемување на сите пензии за 2.000 денари.
Според предвиденото, зголемувањето ќе се реализира во две фази – на 1 септември 2025 година и 1 март 2026 година, преку нов начин на усогласување на пензиите. Пресметката ќе се врши врз основа на просечниот пораст на платите и трошоците на живот, објавени од Државниот завод за статистика. Сумата добиена од овие пресметки ќе се дели еднакво на сите пензионери што го стекнале правото до наведениот датум.
Измените предвидуваат и нова одредба според која осигурениците ќе ги поднесуваат барањата за пензија во местото на живеење, со што ќе се овозможи поголема достапност и поефикасна администрација.
Дополнително, решавањето на управните спорови поврзани со пензиските права ќе мора да се заврши во рок од 30 дена, што, според предлагачите, ќе придонесе за побрзо остварување на правата на граѓаните.
