На 29 јули расправа за интерпелацијата на јавниот обвинител Љупчо Коцевски
Собранието на Република Македонија на 29 јули ќе расправа за интерпелацијата за работата на јавниот обвинител Љупчо Коцевски. Како што е наведено на официјалната веб-страница на законодавниот дом, точката е предвидена во рамки на 64. собраниска седница, која треба да започне во 11 часот.
Интерпелацијата беше поднесена на 26 јуни од пратеничката група на Левица, која преку документ доставен до претседателот на Собранието, Африм Гаши, побара одговорност од Коцевски поради, како што наведуваат, непочитување на уставните и законските обврски.
Во интерпелацијата, Левица посочува повеќе причини за покренување на постапката, меѓу кои селективни кривични истраги за трагедијата во Кочани, логистички влијанија врз работата на обвинителството, хаос во Вишото јавно обвинителство во Скопје, како и непостапување за дивоградбите поврзани со урбаната мафија.
Партијата дополнува дека од почетокот на мандатот на Коцевски, во обвинителството владее нефункционална и токсична атмосфера, постои неажурност во постапувањето по предмети, како и надворешни политички влијанија врз неговата работа, за што, според нив, директна одговорност носи актуелниот јавен обвинител.
