Со звуците на „Тешкото“, бои на македонското знаме и автентични елементи – одбележан Националниот ден на Македонија на ЕКСПО 2025 во Јапонија
Со звуците на „Тешкото“, боите на македонското знаме и автентични елементи од традицијата и културата, денеска беше свечено одбележан Националниот ден на Република Северна Македонија во рамки на ЕКСПО 2025 што се одржува во Осака, Јапонија.
Нашата држава е претставена со павилјон што го симболизира нејзиното богатство – земја со длабока историја, култура и исклучително археолошко наследство, сместена во срцето на Балканот.
На настанот се обрати министерот за надворешни работи и надворешна трговија, Тимчо Муцунски, во својство на шеф на владината делегација, во чиј состав се и министерот за култура Зоран Љутков, министерот за европски прашања Орхан Муртезани, генералниот секретар на Владата Игор Јанушев и шефот на Канцеларијата на претседателот на Владата, Владимир Нелоски.
Во своето обраќање, министерот Муцунски изрази благодарност до Владата на Јапонија, градот Осака, граѓаните на Јапонија и организаторите на ЕКСПО за исклучителното гостопримство и за создавањето на оваа платформа за заедничко осмислување на иднината, под мотото: „Креирање на општеството на иднината за нашите животи“.
Муцунски истакна дека македонскиот павилјон го симболизира богатството на нашата земја — држава со длабока историја и култура, соисклучително археолошко и културно наследство, сместена во срцето на Балканот. Држава која е препознаена како„бисер на Балканот“, благодарение на својата природна убавина, традиција и богатата културна ризница. Вредности кои ја прават државата привлечна туристичка дестинација и вистински бисер на Балканот.
Тој се осврна и на можностите за инвестирање, развојот на билатералните односи со Јапонија, континуираната поддршка што нашата земја ја добива од јапонските партнери, како и на потенцијалот за натамошно зајакнување на политичката и економската соработка меѓу двете земји.
