Трамп: Си ми се јави – Кина: Не, САД ни се обратија во врска со царините
Соединетите Американски Држави се обратија до Кина барајќи преговори за царините од 145 проценти на претседателот Доналд Трамп, објави денес профил на кинескиот државен медиум на платформата на социјалните медиуми, во најновиот извештај за можни чекори кон разговори за царините.
„САД проактивно контактираа со Кина преку повеќе канали, надевајќи се дека ќе водат разговори за прашањето со царините“, објави Јујуан Тантијан на платформата за социјални медиуми „Веибо“, повикувајќи се на анонимни извори.
Гуао Џиакун, портпарол на кинеското Министерство за надворешни работи, вчера изјави: „Колку што ми е познато, немало никакви дискусии или преговори меѓу Кина и САД за царините“.
Трамп во интервју за американските медиуми објавено минатиот петок изјави дека неговата администрација разговара со Кина за да се постигне договор за царините и дека кинескиот претседател Си Џинпинг го повикал.
Пекинг минатата недела постојано негираше дека се во тек такви разговори, обвинувајќи го Вашингтон за „заблуда на јавноста“.
Јујуан Тантијан не е еден од најавторитетните профили поврзани со државните медиуми. „Глобал тајмс“, весник во сопственост на владејачката Комунистичка партија, честопати беше првиот што известуваше за следните чекори на Кина во трговските спорови во последните неколку години.
Трамп вчера изјави дека верува оти постои „многу голема шанса“ неговата администрација да постигне договор со Кина, неколку часа откако Си ја повика Кина, втората по големина економија во светот, да преземе чекори за прилагодување кон промените на меѓународната сцена, без конкретно да ги спомене САД.
