СКОРО ШЕСТ ИЛЈАДИ НОВИ ПРЕТПРИЈАТИЈА СЕ ОТВОРИЛЕ ВО 2021 ГОДИНА: Повеќе од претходната, еве колку се затвориле

Во 2021 година биле регистрирани 5.960 новосоздадени претпријатија, што претставува 9,1 отсто од вкупно активните пазарно ориентирани претпријатија. Во однос на 2020 година, забележано е зголемување на бројот на новосоздадените претпријатија за 15,9 проценти, и тоа најмногу во секторите Трговија, Градежништво, Транспорт и складирање, Информации и комуникации, Преработувачка индустрија, како и Објекти за сместување и исхрана.

Најголемиот дел од новосоздадените претпријатија, 76,4 отсто припаѓаат на услужните дејности, во чии рамки најмногу се од секторот Трговија на големо и мало; поправка на моторни возила и мотоцикли (1.782), потоа Објекти за сместување и сервисни дејности со храна (669) и Стручни, научни и технички дејности (623). 

Потоа 12,5 проценти од новосоздадените претпријатија припаѓаат на секторот Индустрија, а на секторот Градежништво 11,1 отсто.

Новосоздадените претпријатија вработиле 11.991 лице, што претставува зголемување за 21,5 проценти во однос на претходната година. Без вработени биле 16,8 отсто од новосоздадените претпријатија, 77,6 проценти вработиле 1-4 лица, додека 3,6 отсто вработиле од 5 до 9 лица.

– Податоците за структурата на новосоздадените претпријатија според правната форма покажуваат дека најголемо учество имаат претпријатијата категоризирани во групата Друштва со ограничена одговорност и акционерски друштва или 85,4 проценти – се наведува во соопштението на Државниот завод за статистика.

Згаснати претпријатија во 2020 година

Од вкупниот број активни претпријатија, во 2020 година згаснале 8,2 отсто, односно 5.382.

Гледано по сектори на дејност, најголемиот дел од згаснатите претпријатија (30,8 отсто) се во секторот Трговија на големо и мало; поправка на моторни возила и мотоцикли, а според правната форма најголем дел од згаснатите претпријатијата (75,5 проценти) се категоризирани во групата Друштва со ограничена одговорност и акционерски друштва.

Згаснати претпријатија во 2019 година

Од вкупниот број активни претпријатија, во 2019 година згаснале 8,4 проценти, односно 5.544.

Гледано по сектори на дејност, најголемиот дел од згаснатите претпријатија (35,5 отсто) се во секторот Трговија на големо и мало; поправка на моторни возила и мотоцикли, а според правната форма дури 76,6 проценти се категоризирани во групата Друштва со ограничена одговорност и акционерски друштва.